Senn nálgast jólahátíðin með allri sinni birtu og yl. Við Fóstbræður búumst til jólahalds og fögnum hátíðinni ekki síður en aðrir enda höfum við staðið í ströngu undanfarið. Við sungum með Frostrósum 10. árið í röð og afmælistónleikarnir fóru fram í Hörpu, tónlistarhúsinu okkar góða. Við höfum líka unnið að upptökum á öllum karlakórslögum Sigvalda heitins Kaldalóns, þess mikilhæfa og þekkta tónskálds. Flestir þekkja lög hans en færri karlakórslögin hans sem hafa ekki oft heyrst í flutningi. Stefnt er að því að ljúka því verki á næsta ári. Eftir áramótin höldum við áfram æfingum og upptökum á lögum Kaldalóns og tökum til við æfingar fyrir vortónleika okkar sem verða 1. – 5. maí. Einsöngvari á vortónleikum verður Gissur Páll Gissurarson, tenór, sem nú er þjóðkunnur fyrir frábæran söng og skemmtilega framkomu. Svo koma alltaf upp einhver skemmtileg verkefni sem ekki eru frágengin en koma í ljós á sínum tíma. Fóstbræður óska öllum velunnurum kórsins gleðilegra jóla og gæfuríks nýs árs með von um að hittast á tónleikum okkar á árinu 2012.