Hvert starfsár karlakórsins Fóstbræðra er í senn nýtt og gamalt. Nokkrir liðir hvers starfsárs eru fastir og ganga eftir þrautreyndu skipulagi til margra áratuga. Önnur verkefni eru ný og fersk og krefjast þess að kórinn takist á við tónlistina með opnum huga og sveigjanleika.

Dæmigert starfsár Fóstbræðra hefst snemma að hausti. Varla líður sú vika að kórinn komi ekki fram við eitthvert tækifæri hvort sem það er brúðkaup, afmæli, jarðarför, opnanir, vígsluhátíðir eða einhver önnur opinber tækifæri. Samhliða slíkum verkefnum tekur kórinn þátt í tónleikahaldi með öðrum eða sinnir æfingum fyrir upptökur eða tónleika.

Aðventukvöld og þátttaka í tónlistarviðburðum sem tengjast jólum eru árviss hluti af verkefnum kórsins.

Seinni hluta vetrar einbeitir kórinn sér að æfingum fyrir venjubundna vortónleika sem er jafnan lokið í apríl og eftir það gæti undirbúningur fyrir utanför eða æfingar fyrir þátttöku í listahátíð eða tónlistarhátíðum verið á dagskrá.

Þrennir tónleikar eru fyrirhugaðir á þessari haustönn.

Þeir fyrstu verða í Langholtskirkju föstudaginn 15. október kl. 20 þar sem fram koma Fóstbræður og finnskur kór Manifestum sem stofnaður er út úr vinakór Fóstbræðra Muntra Musikanter.

Daginn eftir 16. október taka Fóstbræður þátt í Kötlumóti á Flúðum. Katla eru samtök karlakóra á suðurlandi og eru haldnir tónleikar á þess vegum á 5 ára fresti þar sem allir kórar sambandsins koma fram hver í sínu lagi og einnig syngja allir kórarnir saman.

Þriðju tónleikarnir á þessari önn verða svo í Langholtskirkju á allra sálna messu mánudaginn 1. Nóvember kl. 20. Þeir tónleikar eru til minningar um látna og ber tónlistin merki um það. Tónleikarnir hafa hlotin heitið TIL LJÓSSINS OG LÍFSINS sama nafn og nýjasti geisladiskur kórsins ber með sálmum og lögum sem hafa unnið sér sess við margskonar kirkjulegar athafnir.

Einnig eru Fóstbræður hluti af jólatónleikum Frostrósa í Laugardalshöll í desember eins og undanfarin ár.